काठमाडौं। नेपाली राष्ट्रिय महिला टोलीकी स्टार सावित्रा भण्डारी साम्बाले साउदी अरेबियामा जारी वाफ वुमन्स च्याम्पियन्सिपको फाईनल नखेल्ने भएकी छन्।
अखिल नेपाल फुटबल संघ (एन्फा) का अनुसार फ्रेञ्च क्लब अभान्ट ग्वेंगाम्पमा आबद्ध साम्बाले बिहीबार जोर्डनविरुद्धको फाईनल खेल नखेल्ने भएकी हुन्।
उनी लिग खेल्न फ्रान्स जाने भएकोले साम्बा फाईनलमा नेपालको तर्फबाट मैदानमा उत्रिने छैनन् । जुन नेपालको लागि भारी सावित हुन सक्छ ।
क्लबसँगको सम्झौताअनुसार साम्बालाई फिफा विन्डोको खेल खेल्न मात्र अनुमति छ।
यसअघि समूह चरणका खेल फिफा विन्डोमा भएका कारण उनले खेलेकि थिइन्। फाइनल भने फिफा विन्डो बाहिरको खेल हो। जारी प्रतियोगितामा साम्बाले ९ गोल गरिसकेकी छिन्।
क्लबसँगको सम्झौता र फुटबलको व्यावसायिक मूल्यलाई सम्मान गर्दै साम्बाले फाइनल नखेल्ने एन्फाले उल्लेख गरेको छ।